Considerando a oportunidade de apoiar unha iniciativa fundamental para un axeitado desenvolvemento da música do país que non nos fixese depender dos intereses comerciais das discográficas de Madrid, desta vez eliximos a discográfica acabada de crear Ruada, S. A.
Unha vez rematado o compromiso contractual con Philips-Fonogram e, en consecuencia, xa sen a presión de ter que entregar un disco por ano, tomamos a futura gravación con máis calma, unha calma relativa, pois o ritmo de actuacións non decaeu e tampouco a dificultade de concilialas coas obrigas laborais de cada un. Non eran moitas as datas libres de recitais ao longo do ano, e as poucas que quedaban libres aproveitabámolas para ensaios e para ir preparando temas novos.
Considerando a oportunidade de apoiar unha iniciativa fundamental para un axeitado desenvolvemento da música do país que non nos fixese depender dos intereses comerciais das discográficas de Madrid, desta vez eliximos a discográfica acabada de crear Ruada, S. A., fundada na Coruña en 1979 coa pretensión de normalizar e aglutinar a produción musical do momento, que en dous anos escasos conseguira un amplo catálogo.
Así, 1981 ve nacer o noso quinto traballo: Quen a soubera cantar, gravado a finais de 1980 en Madrid, no estudio AUDIOFILM (aínda faltaba para dispor de estudios de gravación profesionais en Galicia).
Consta de 10 temas, dous deles con letra e música tradicional («Pandeiretada de Outes» e «Pra onde vas María»), e seis de autor. Entre estes últimos adquire gran presenza a poeta Marica Campo, que colabora coa letra de tres cancións: «Mencer», con música de Xesús Mato (tamén coautor da letra); «Dáme lume», unha estrofa popular desenvolvida pola autora; e «Canción para adurmiñar a lembranza», con música de Freire inspirada nun tema tradicional. Hai un poema de Ramón Cabanillas («Cencia do Adro»); dous temas de autores portugueses: Manuel Alegre («O meu amor mariñeiro») e Antonio do Aleixo («Foliada do Aleixo»); e un con letra popular («Romance da lavandeira»), todos eles musicados por Mini, quen ademais se encargou da letra e música de «Longa noite».
